استرداد الضريبة على الدخل للموظفين الجدد

 

اش واقع اشنو الجديد فمستشفى القرب محمد الخامس بوادي زم

صراحة ملي توصلت بواحد البلاغ ديال 3 نقابات قلت مع راسي ان القضية تستحق التتبع اواه 3 ديال النقابات محامين فورقة وحدة شي حاجة كاينة تما المهم هزيت موطوري وطلعت مادام الأمر تايهم الساكنة الوادزامية بالدرجة الأولى وباش نقدر نجاوب الناس لي كيسولوني خاص نعرف بالضبط آش كاين..

شكون نسول..امر طبيعي انك تمشي عند مدير السبيطار بالحق انا عارف ان السبيطار مافيهش مدير سنين هادي (وهاد الشي غادي نرجعو ليه) قلت مع راسي اجي نسول اي واحد خدام هنا لي تلاقيتو تايجاوبني : " خويا انا ماشي مع هاد النقابات " اولا تيقول ليا مافراسي والو ولكن الواعرة هي فاش قالو ليا شي مستخدمين فالسبيطار واش هاد النقابات عندنا اصلا هنا ؟؟ ....تشا رايح واش من نيتك

انا عارف بلي كاينة نقابة فيها اغلب الموظفين ماشي هي لي كتبت هاد الشي 

وهاد 3 النقابات لي كتبو كنسمع منهم ب 2 فيهم البقايا ديال الموظفين كاين لي خرج تقاعد ومشا كاين لي تحول من المدينة وكاين لي داير بحال الحرباء كل مرة عندو لون ..هاد فصيلة الحرباء هوما نيت لي خرجو من هادوك جوج النقابات و دارو النقابة رقم 3..المهم من لحيتو كيلقم ليه...

المهم خوكم عطش والمغرب باقي ليه 5 ساعات مجبدة قلت اجي نشد الظل حتى يبان الحجل وف الانتظار هزيت التيليفون وعيطت ربما يعطيوني الخبر اليقين.

" الموضوع ومافيه ان هاد 3 مابغاوش واحد السيدة دير مديرة على السبيطار " وهنا شديت راس الخيط وعرفت فنفس الوقت ان هاد النقابات لالا لا علاقة لأن داكشي لي كاتبين فالورقة لااااا علاقة بهاد الموضوع ولكن هوما قاصدين هاد الموضوع وماخرجوش ليها نيشان زعما بغاو يخليو لي تايقرا هو يجتاهد ويتخيل اش واقع...

ارا هاداك  راس الخيط وآجي دابا نشرح ليك مزياااان..وحيت عارفك صايم غادي نعطيك غير لقطات باش مادوخش

** سبيطار وادي زم  شي 4 سنين هادي وهو بلا مدير علاش ؟ حيت بنادم مابقاش باغي المسؤولية وصداع الراس والسبيطار غادي بشي ناس خدامين ف الإدارة ديال وادزم تحت الإشراف ديال المندوبية فخريبكة و تيسير الله 

وحدة من هاد الناس كانت ممرضة في الأصل الاسم ديالها ن.م  شي 6 سنوات هادي ناضت وحدة من النقابات لي مابغاوهاش دابا كتقول بلي هاد الممرضة كتخدم بجد وعندها مؤهلات باش تولي هي رئيسة قطب العلاجات التمريضية وبالفعل تعينات فهاد المنصب وولات فالإدارة..

وحقا هاد الممرضة مشهود لها بالكفائة وكلشي فالسبيطار تايقول الله يعمرها دار وكتخدم بالنية و عندها غيرة على المدينة وحتى فاش هدرت مع شي ناس فمندوبية خريبكة أكدو ليا هاد الشي و أكدو لي أيضا أن المندوب الإقليمي أشاد بالعمل و المجهودات ديالها أكثر من مرة وفي اجتماعات رسمية وخبارها واصلة حتى للعمالة..هه

والمرأة المغربية عزيز عليها تبين حنت إيديها وهاد الشي لي دارت ختنا ن.م فالأزمة ديال كورونا حيت كانت واحد من العناصر الاساسية فالتنسيق و التنظيم داخل المستشفى ومع السلطات و مع المستشفى الإقليمي حتى دازت الأمور بخير. وكملات العمل ديالها في صمت بتنسيق مع السيد المندوب الإقليمي باش يزيد السبيطار القدام 

(بين قوسين سمعت بلي الفتاح رجع كيدير العمليات الجراحية و فالايام الجاية حتى الطبيب ديال الانف و الاذن والحنجرة غادي يولي يدير عمليات فوادزم وهاد الشي سابقة تستحق التنويه).

لي بان لي من هاد الشي ان هاد السيدة ربما عمرها فكرت تكون مديرة وربما المسؤولين هوما لي اقتارحو عليها تشد هاد المنصب  بالنيابة زعما مؤقتا حتى يجيب الله التيسير ويتفك العكس حيت كل عام الوزارة كتفتح المنصب للتباري حتى واحد ماكيتقدم 

هادوك النقابات ملي شمشمو هاد الهدرة مارضاوش ولغاية في نفس يعقوب تجمعو بحال اخوة يوسف حسدا من عند أنفسهم وبداو يقولو : لا سيدي بغينا السبيطار يبقى غادي بلا شيفور ومابغيناش هاد السيدة وعلاش هي بالضبط وهاد الشي ماشي قانوني وهي غير ممرضة..

وحيت انا قلم حر وماشي مأجور وكنسمع لكلشي وحيت هاد المسائل القانونية ديال الصحة مغاديش نفهم فيها حيت ماشي الدومين ديالي تواصلت مع واحد الصديق فالرباط لي هو بدورو تواصل مع مصادر ديالو فالوزارة وشرح ليا ان  منصب ديال مدير فالمغرب ولى كيتحل للتباري أمام كل واحد متوفرة فيه الشروط يكون طبيب ممرض أو تقني ضمانا لتكافؤ الفرص ولكن ملي ماكيتقدم تاشي واحد أو ماكينجح تاواحد ممكن تعيين مدير بالنيابة " مؤقتا كيف سبق شرحت" في انتظار تتعاود المباراة من جديد.

ايوا را هاد الشي لي واقع فوادزم ولكن هاد النقابات تقرصو ومابغاوش هاد السيدة تكون مديرة..ماباغينش يزيدو للقدام واخا مبغيتوهاش حتى دابا منديروهاش عطيونا نتوما شي واحد منكم يترشح لهد المنصب مؤقتا : لا ماكاين تاواحد منا باغي (أو ماقادرش) المهم بغاوها تبقى سايبة مايرحمو مايخليو رحمة سيدي ربي تنزل...

ايوا مالكم اش ضركم : هاديك غير ممرضة 

تاكيفاش غير ممرضة و را المدير الرسمي لي كان قبل فالسبيطار ديال وادزم كان ممرض ودابا راه تحول و ولى مدير ديال مستشفى إقليمي ف الفقيه بن صالح ونتوما فيكم ممرضين عطيو القيمة لراسكم شوية

اش ضركم تاني : وبغينا تاحنا فرصة 

مرحبا عطيونا واحد ولا جوج ولا تلاثة منكم و نزيدوها عليكم ونديرو انتقاء : لا حنا مامسالينش لهاد الشي وتاواحد ماباغي وحنى أصلا ع شوية

واش بغيتو : بغيناها تدخل معانا للنقابة ديالنا و داك الساعة الله يسخر..".

 (منقول)