القائمة الرئيسية

الصفحات

البنج.. تأملات في جوف الليل



سالات الروينة و قوة الحركة ديال قبل البنج، ملي يالاه كايدخل المريض للبلوك و كايتعود على البرد لي فيه، كانشدو ليه العرق و كانقولوليه يرخف راسو و يتنفس مزيان و يستعد باش يشد الطيارة و يسافر، لحظة الاقلاع لعالم الوقت فيه كايوقف. 

طلع النفس

تنفس

حسب حتى المية بالمقلوب

100, 99,96,87,8...........

مشى(...) سمفونية الآلات لي حدانا كاتبدا تعزف، apnée أو توقف التنفس تعلن رسميا عند فريق التخدير و الإنعاش و العمل على تعويض عمل الرئتين في عد عكسي ضد انخفاض مستوى الأكسجين فالدم بدات....

هبوط حاد فمستوى ضغط الدم كاتسمع أو كاتشوف فالشاشة

8/6

غاديا طلع مع الincision عاود عبر باقا مزدوحة..و كانتصرفو باش نعاودو نطلعو مستوى الضغط....و هاتشي كله كايدوز فلمح البصر...

نعس المريض و تقاد، دابا الطيارة فمرحلة التوازن و السمفونيات هداو أو على الأقل نقولو ولات أصواتها متناغمة.

المرحلة المسكوت عنها الآن و لي قلييل لي كايعرف المعنى الحقيقي ديالها..

البناج فوق الكرسي...آش كايدير كاع؟ 

البناج مرتبط مع جميع أنواع الشاشات لي عندو فديك القاعة و فهاد اللحظة تايطبق المعنى الحرفي ديال "البق ما يزهق" و داكشي علاش أنا خصوصا فهاد المرحلة، ماكنبغيش لا نشد التيليفون و لا نشرك اللغا مع جنس بشر.

شي أمور ماكايشوفها غير حنا، و كاتقلقنا غي حنا...

الدمعة، واحد الدمعة خاصة تتخرج من عين وحدة و كاتشوفها نازلة بشوية...كانتصرفو و لكن ماتنساوش نمسحوها و لو أن المريض غايب على الوعي لكن عارفينو كايحس..و الدمعة تتعني الألم أو الأمل و الشاشات هي لي كاتعطينا اينا وحدة فيهم كاتعني...

التعرق فالجبهة أو فالدات كاملة...يعني لازم التدخل و معرفة أش واقع لداخل...و عرق عن عرق يختلف..و كاين اللحظة لي الذات كاتعاود تنشف فيساع بوحدها و هاتشي كاملو عندو معاني و غي حنا لي كانشوفوه و نعايشوه لحظة بلحظة ماكانبعدوش على المريض و لو ثانية وحدة.

لون الشنيفات و حجم حدقة العين لي كايتغير على حسب تأثير المخدر و لي دايما تحت مراقبتنا.

حرارة الجسد و لي كانتفقدوها بشكل دوري بيدينا. و لون الأنامل لي تاهو بدوره تانراقبوه.

دقات القلب، ضغط الدم و شحال عدد المرات لي كاينتنفس فيها المريض فالدقيقة.

ضغط الهواء فالرية ديالو، و فالأنابيب تحت المراقبة اللحظية كل ثانية مسجلة و أشنو هو الخليط الغازي لي كايتنفس...

و شلا باقي مابتعاود...الحاصول..

الحمدلله حيت ختارني ربي نكون بناجة
هل اعجبك الموضوع :

تعليقات

تعليقان (2)
إرسال تعليق
  1. تبارك الله عليك وكيف كيقولو الله يخرج سربيسك على خير

    ردحذف
  2. moi aussi je suis anesthesiste depuis 18 ans et je sens ce que tu sens et mem on fait de lanesthesie sans aucun monitorage sauf cliniquement ds les annee 19
    99/2000

    ردحذف

إرسال تعليق